2020: Un pé na rúa, outro nas institucións

Chegamos xa ao remate deste ano 2019 no que se elixiu unha nova corporación municipal, e no que eu decidín dar o paso adiante e encarar a tarefa de asumir a portavocía do noso grupo municipal; tarefa que nunca tería asumido de non poder contar con un gran equipo que me acompaña, dende aquí quero aproveitar o momento para darlle as grazas unha vez máis por permitir que este proxecto siga adiante e cada día poidamos contar con máis mans que traballan en chave de país.  

  

En maio presentamos unha candidatura ambiciosa con un programa de goberno centrado na promoción do emprego e a aposta polos sectores produtivos do noso concello, se ben os resultados non foron os mellores, seguimos esforzándonos e tentando facer valer cada un dos votos que recibimos como se nos tivesen outorgado a maioría absoluta exercendo unha oposición coherente e responsable: coherente co noso programa e coas ideas que levamos por bandeira, e responsable co noso concello e con toda a veciñanza, independentemente de quen sosteña o bastón de mando.  

  

No que vai de ano traballamos en varias preguntas, mocións e emenda que presentamos no pleno, pese a que por varias veces tivemos que reclamarlle a alcaldía o noso quenda de palabra. Conseguimos que dende o pleno se aprobase a moción que o noso grupo municipal elaborou contra a violencia machista como declaración institucional de cara ao 25N, indo máis alá do meramente simbólico e comprometendo a administración local a traballar no eido da prevención e erradicación desta lacra.  Conseguimos tamén que o pleno da corporación aprobase unha emenda á formación da Asociación de Amigos do Camiño de Santiago da Ría de Muros e Noia para evitar que acabase converténdose nunha ferramenta electoral de cara aos vindeiros comicios á Xunta, aínda que dende o grupo municipal acabasen por deixala aparcada incumprindo a vontade do pleno. Condicionamos o noso apoio ao POS a que dunha vez por todas se comezase co saneamento nas parroquias de Abelleira e Torea e conseguimos con elo que se aprobase unha partida para comezar unhas obras que debían terse realizado fai moito tempo.   

  

Encaramos o ano que comeza traballando en varias propostas que levaremos ao pleno nos primeiros meses do 2020: elaboraremos unha proposta de  acordo para a aprobación dunha normativa que regule as casas de apostas e a súa publicidade antes de que esta lacra se instaure nas nosas rúas, seguiremos esixindo coa nosa voz que se cree un plan xeral de mantemento para os edificios e mobiliario municipal, que se regularicen os postos de traballo dependentes do concello e se lle pague a cada quen o que corresponde, seguiremos defendendo que se aposte por todas as parroquias e se mire cara todas elas sen distinción, dende o salón de plenos e nas rúas apoiando todas aquelas causan que busquen coidar a nosa Terra, a nosa xente e a dignificación do emprego.  Seguiremos, en definitiva, defendendo todo aquilo co que nos comprometemos en maio deste ano que remata.

  

Nestes derradeiros días dun 2019 no que o panorama político resultou tan confuso e desesperanzador, sentimos a necesidade, unha vez máis, de agradecer a todas as persoas que confiaches en nós no pasado maio e desexarvos un ventureiro ano 2020.  

  

  

  

Saúde e Matria
María Lago
Voceira BNG Muros